Jeannette Kagame akomeje gushora amafaranga y'imbuto foundation mu bikorwa by’ubutasi by'imbere mu gihugu no hanze yacyo.

Nkuko tubitangarizwa na zimwe muri maneko za Kagame, «Imbuto Foundation» ibona amafaranga aturuka mu baterankunga bo mu gihugu cy’Ubudage mu cyitwa Rhénanie Palatinat, aya mafaranga akaba atangwa kugirango afashe imfubyi n’abapfakazi n’ibindi bikorwa byo gutabara imbabare Jeannette Kagame avuga ko yibandaho, nyamara amakuru atugeraho yemeza ko ayo mafaranga akorerwa gusa inyigo yukwo yakoreshejwe “Balancing Financial Accounts”, ikindi gice kinini cyayo kigashorwa mu bikorwa by’ubutasi byo mu gihugu imbere no hanze yacyo.

Umuvugizi washoboye kumenya ko Gen Jack Nziza abona akayabo katagira ingano, agakuye mu mafaranga y’uyu mushinga, ayo mafaranga akaba ashorwa mu bikorwa by’ubutasi bitandukanye aba yatumwemo na Jeannette Kagame, na none Gen Jack Nziza akaba yitwikira ijoro akajyana amaraporo y’abantu bagomba kwicwa cyangwa gufungwa kugirango Jeannette Kagame abihe umugisha.

Igitangaje muri ibi byose nuko Jeannette Kagame akunze kwigaragaza nk’umuntu ufasha abana n’abagore b’imbabare , nkuko akunze kubikora mu bitangazamakuru bikoreshwa n’inzego z’ubutasi z’umugabo we, ibi binyamakuru bikaba ari The Newtimes.co.rw n’igihe.com, bikoreshwa mu kwamamaza uwo mushinga akuriye.

Ibyandikwa muri ibyo bitangazamakuru bivuga ko uwo mushinga uba wakoze akazi kenshi ko gufasha imfubyi n’abapfakazi, sibyo gusa amafaranga yuwo mushinga akora gusa doreko twanashoboye kubona amakuru afite gihamya yerekana ko amafaranga aturuka mu «Imbuto Foundation» ashorwa mu bikorwa by’ubutasi mu gihugu imbere no hirya no hino mu bindi bihugu byo hanze Jeannette Kagame afitemo inyungu zo kuneka.

Nkuko bamwe muri ba maneko ba Kagame babidutangarije, hari inzego z’ubutasi zisanzwe zizwi na Leta, zihabwa akayabo ko gukora ako kazi ko kuneka, Jeannette Kagame na we akaba afite urwego rwe rutazwi rukorera mu zindi nzego z’ubutasi, uru rukaba rukoresha «budget» iturutse mu mushinga «Imbuto Foundation» kugirango rurusheho gutanga umusaruro ugaragara.

Aka kazi ko kunekesha Gen Jack Nziza na bagenzi be, Jeannette Kagame akabakoresha mu rwego rwo kugirango arusheho kugira ingufu mu gihugu, ingufu zirenze izo yari asanganywe nk’iz’umugore wa perezida, izi ngufu zose akaba azikoresha mu kwirenza inzirakarengane ziba zatanzweho amaraporo y’uko ari «abanzi b’igihugu».

Abo twashoboye kumenya bakoreshwa na Jeannette Kagame mu ibanga, banahabwa amafaranga aturutse mu mushinga «Imbuto Foundation» yo kuneka mu bihugu baba boherejwemo gukora nk’aba «diplomates», ni nk’uwitwa Shakila K. Umutoni, uyu akaba ari we maneko wihariye wa Jeannette Kagame, umugezaho uko ibikorwa by’«abanzi b’igihugu» byifashe muri Canada no kugaragaza «abanzi» abo ari bo, dore ko kuri Jeannette Kagame na Gen Jack Nziza, «umwanzi w’igihugu» ari uwo ari we wese unenga cyangwa utavuga rumwe n’ubutegetsi bwa Paul Kagame.

Undi mukozi wa Jeannette Kagame ni uwitwa Linda Kalimba, uyu akaba ari umwe mu bungirije ambasaderi w’u Rwanda mu Bwongereza, akaba ari na we uhagarariye inyungu za Jeannette Kagame mu gihugu cy’Ubwongereza, ku buryo bw’ibanga. Uyu Linda akaba anafite ingufu zidasanzwe kuko uwo atanzeho raporo muri ambasade atarara, na we akaba ari umwe mu bahabwa amafaranga y’«Imbuto Foundation» kugirango ayakoreshe mu nyungu za Jeannette Kagame zo guhiga abatavuga rumwe n’ubutegetsi bwa Kagame.

Uwitwa Joseph Uwamungu na we ni maneko wa ambasade y’u Rwanda mu Bubiligi. Nubwo bigaragarira buri wese ko yananiwe gukora aka kazi yahawe, ntibimubuza gukomeza kugirirwa icyizere kubera ko umugore we avukana n’uwa Gen Jack Nziza. Maneko Joseph Uwamungu ari mu batanga amakuru mu buryo bw’ibanga kuri Gen Jack Nziza, uyu na we akayashyikiriza Jeannette Kagame. Kuba umugore wa Joseph Uwamungu afitanye isano ya hafi n’uwa Jack Nziza, byatumye abayobozi bakuru b’inzego z’ubutasi bananirwa kumuhindura, nubwo arara mu tubari two mu Bubiligi anywa, yirukanka ku banyarwanda batavuga rumwe n’ubutegetsi bwa Kagame, anabatera ubwoba kugirango bitandukanye n’imitwe ya politiki irwanya ubutegetsi bw’igitugu bwa Kagame, ari na ko atagaguza ayo mafaranga aba yahawe mu buryo budasobanutse, aturutse muri wa mushinga «Imbuto Foundation», igice kindi cy’aya mafaranga akaba agikoresha mu kugura abitwa «abanzi ba Kagame» kugirango bayoboke ubutegetsi bwe.

Undi uzwi mu bakoreshwa n’inzego za Jeannette Kagame mu guhiga «abanzi b’igihugu», ni maneko wo muri ambasade y’u Rwanda muri Afurika y’Epfo, Didier Rutembesa. Yitwa ko ahagarariye urwego rw’ubutasi rw’igihugu (NSS) muri ambasade y’u Rwanda muri Afurika y’Epfo, ariko amakuru agera ku Umuvugizi yemeza ko uyu Didier Rutembesa abona akayabo katabarika gaturuka mu mushinga «Imbuto Foundation», aka kayabo akaba agashora mu guhiga abatavuga rumwe n’ubutegetsi bwa Kagame batuye muri Afurika y’Epfo.

Uwitwa Lt Col Burabyo James na we ari mu bakorera urwego rw’ubutasi rwa Jeannette Kagame Nyiramongi. Burabyo ahabwa akayabo kiyongereye kuko ahabwa n’inzego za gisirikare ahagarariye muri ambasade y’u Rwanda muri Uganda, ako kayabo kinyongera akaba agakura kuri Gen Jack Nziza kugirango ajye agenda ahiga abatavuga rumwe na Kagame bahungiye muri Uganda, ari na ko akoresha ako kayabo mu kumunga inzego z’ubutasi za Uganda, aho agenda atagaguza ayo mafaranga mu kugura amakuru ajyanye n’ibikorwa bya gisirikare hamwe n’iby’ubutasi, ku buryo ashyikiriza Gen Jack Nziza raporo akura mu nzego z’ubutasi za Uganda, Jack Nziza na we akazishyikiriza Jeannette Kagame.

Tukaba tuzakomeza kubagezaho ibyo aba bagaragu b’urwego rw’ubutasi rwa Jeannette Kagame bagenda bubaka, haba mu gihugu imbere cyangwa hanze yacyo muri za ambasade zihagarariye u Rwanda.

Igiteye impungenge muri ibi byose kikaba ari uko amafaranga yakagiriye akamaro imbabare zitandukanye, nkuko Jeannette Kagame agenda avuga ko ari cyo yayasabiye igihugu cy’Ubudage, adakoreshwa ibyo Rhénanie Palatinat yayageneye, ahubwo ashorwa mu bikorwa by’ubutasi bigamije guhiga abatavuga rumwe na Kagame babarizwa hirya no hino mu bihugu bamuhungiyemo, haba ku mugabane wa Afurika, Uburayi cyangwa muri Canada.

Gasasira, Sweden.
info@umuvugizi.com

Abaturage bakikije inyubako ya Kagame "convention Center" barimo gukurwa mu byabo ku ngupfu n'umugi wa Kigali mu rwego rwo gushakira umuherwe Kagame ibindi bibaza yu bakamo andi mazu kugirango inyubakoye iture ahantu hitaruye .

Aba baturage bari batuye ahantu Leta ya Kagame yavuze ko hatagomba guturwa, dore ko hitwaga “High Risk Zone”, ahandi bikavugwa ko hari mu gishanga “Wetland”, ni bo bahawe amabwiriza yo kuzinga akarago vuba na bwangu bakimuka, batanababwiye aho berekeza.

Mu gihe Itegeko Nshinga ry’u Rwanda rivuga ko umutungo w’umuntu ari ntavogerwa, ntibyabujije ko ku mabwiriza ya mayor w’umugi wa Kigali, umunyamabanga nshingwabikorwa w’umurenge wa Kimihurura, Nyiridandi Mapambano, yanditse ibaruwa ku ya 02/01/2013, asaba abaturage baturiye aho hantu kwimuka nta yindi nteguza, bataneretswe nibura aho babogeka umusaya.

Igitangaje muri ibyo byose nuko ahantu Leta irimo kwirukana abo baturage nta nteguza cyangwa ingurane bahawe, bahabakuye bababeshya ko hatemewe guturwa ariko igiteye agahinda nukwo aho hantu haturanye n’inyubako ya Prezida Kagame ku Kimihurura, muri ibyo bibanza bazakurwamo ku ngupfu akaba ari na ho nanone perezida Kagame azubaka andi mazu y’akataraboneka azwi ku izina rya “Estates”, ayo mazu na none akaba agomba guturana n’inyubako ya «Conventional Centre» y’umuherwe Kagame Paul.

Umwe mu basaza w’imyaka 72 y’amavuko, utuye mu gace barimo kwimuriramo abaturage ku ngufu, wari unahafite inzu y’ibyumba bine n’uruganiriro, akaba yari anahamaze imyaka igera kuri mirongo itatu ahatuye, aribaza impamvu atigeze ahirukanwa n’ubutegetsi bwabanjirije ubwa Kagame, akaba yibaza na none nimba ari bwo Leta ikimenya ko abaturage batuye aho hantu hatemewe n’amategeko. N’amarira menshi, uyu musaza yibazaga aho agomba kwerekeza, dore ko nubwo Leta ya Kagame irimo kubakura mu mitungo yabo ku ngufu, hagiye kubakwa andi mazu y’akataraboneka yo guturamo arenga hafi mirongo itandatu, kandi akaba ari ay’umuherwe Paul Kagame, wihishe inyuma y’amasosiyete ya RPF yitwa Crystal Ventures.

“Nimba perezida Kagame ashaka ko tuhimuka, tuzabikora kuko turamutse tutabikoze n’ubundi yatwica; ariko na none ntidufite aho kujya”. Aya akaba ari amagambo yavuzwe n’umubyeyi wacitse ku icumu, ufite umuryango w’abantu bagera ku umunani, wavugaga ko yashobewe, anatemba amarira mu maso, dore ko atanafite aho yakwerekeza.

Abo baturage bahatirwa kwimuka ku ngufu bakaba barimo kurira ayo kwarika, ari na ko binubira icyo cyemezo cyo kubakura mu mitungo yabo nta ngurane bahawe. Umwe muri bo ufite umuryango w’abantu 12, akaba yarabidutangarije muri aya magambo : “Sinshobora kubona amikoro yo kugura ubundi butaka bwo guturamo; aha hantu ni ho ba gakondo bacu bari batuye; ni na ho twakuriye kuva tukiri abana; inzu yange ni yo nakuragamo amaramuko; none ni nde nakwitabaza kugirango andenganure? Nta kizere cy’ejo hazaza mfite, ni kubera iki perezida Kagame akomeje kudufata gutya; ese kuba umukene ni icyaha ?”

Gasasira, Sweden.

Abagize inteko nshinga mategeko bataha ibikorwa bya Dane Associates

Urwo rubanza hagati ya Dane Associates na Leta ya Kagame rukaba rukomeje kubera mu rukiko mpuzamahanga rw’ubucuruzi, rufite icyicaro mu Bufaransa, abashoramari ba Dane Associates bakaba ari bo batangije umushinga wo gucukura gas methane mu kiyaga cya Kivu, umushinga witwa Kibuye Power “KP1”.

Abo bashoramari bakaba barega Leta y’u Rwanda kuba yarabambuye, ikanabahuguza umushinga bitangirije kuva ku nyigo kugera ku mamashini yo gucukura iyo gas methane mu Kivu, uwo mushinga wa «Kibuye Power 1» ukaba ufite agaciro karenga miliyoni makumyabiri z’amadolari.

Amakuru akomeje kugera ku Umuvugizi akaba yemeza ko abitabye uru rubanza Leta y’u Rwanda iregwamo ubujura ari abitwa Albert Butare, wohoze ari umunyamabanga wa Leta ushinzwe ingufu, Mirenge John wahoze ari umuyobozi wa Electrogaz, na Katurebe George wahoze ari umuyobozi w’ikigo cya Leta cyitwa CEPEX, uru rubanza rukaba rwanitabiriwe n’uwahoze ari umunyamabanga wa Nsanzumuganwa Emmanuel, wari umunyamabanga mukuru muri minisiteri y’ibikorwa remezo.

Aba bose bitabiriye uru rubanza bakaba bakomeje gusobanurira urukiko impamvu Leta ya Kagame yafashe icyemezo cyo guheza abashoramari ba Dane Associates mu mushinga batangije nta bwishyu babahaye dore ko nk’uko twabivuze hejuru, iki gikorwa cy’aba bashoramari gifite agaciro karenga miliyoni makumyabiri z’amadolari ya Amerika.

Gasasira, Sweden .

Umunyagitugu Paul Kagame akomeje gukora ubu bujura ndengakamere, aho hafi 60% z'ayo mafaranga yatse, azayashora mu bucuruzi bwe bwite.

Igitangaje muri ibi byose nuko byagaragaye ko umunyagitugu Paul Kagame akomeje gukora ubu bujura ndengakamere, aho hafi 60% z’ayo mafaranga yatse, azayashora mu bucuruzi bwe bwite.

Muri ubu bujura Kagame avuga ko muri izi miliyoni zose yatse, magana abiri z’amadorari muri zo azazikoresha mu bikorwa byo kwishyura amadeni yagiye yaka yo kubaka inyubako ye bwite, Convention Center, ibarizwa ku Kacyiru hafi ya banki ya gisirikare, CSS, ayandi ngo akaba azayashora mu bikorwa by’igenamigambi ry’iterambere rya Rwanda Air, iyo Rwanda Air ikaba na yo ibarizwa mu masosiyete ye bwite agize Crystal Ventures. Andi mafaranga agera kuri miliyoni ijana na mirongo itanu z’amadolari azava kuri iyi nguzanyo, akaba azakoreshwa mu bikorwa byo kurangiza inyubako ya perezida Kagame yavuzwe hejuru, ari yo Convention Centre.

Ibi bikaba bivuze ko miliyoni mirongo itanu zonyine ari zo zizashorwa mu gikorwa gifitiye igihugu akamaro, aho ziteganyijwe kubakwamo urugomero rw’amashanyarazi.

Nubwo perezida Kagame yari asanzwe avugwa mu bikorwa by’ubujura butandukanye, ubwo noneho arimo gukora ubu bwo kugwatiriza igihugu kugirango abone akayabo katabarika ko gushora mu bucuruzi bwe bwite, ni bwa bundi bwitwa ubw’isiha rusahuzi. Mirongo itandatu ku ijana y’aka kayabo kose, kazakoreshwa ku mushinga w’iyo nyubako ya Convention Centre, ibi bikaba na none mu gihe ako kayabo kazishyurwa sosiyete ya Perezida Kagame, ari yo Crystal Ventures, dore ko ari yo muterankunga w’iyubaka w’iyo nyubako ya Convention Center, bivuze ko Perezida Kagame asahura umutungo w’igihugu awukura mu isanduka ya Leta ukajya mu mifuka ye bwite.

Uyu muvuduko w’ubujura bukomeje gukorwa na perezida Kagame, nkaho afite uwo asiganwa na we, uteye inkeke, dore ko abanyarwanda twavuganye bafite impungenge zifite ishingiro zuko perezida Kagame asigaje kugwatiriza igihugu cyose, mu gihe kizaza abanyarwanda n’abuzukuru babo bakaba ari bo bagomba kuzaruha bishyura ako kayabo kose k’amadeni perezida Kagame azaba yarasahuye, mu gihe abana be bazaba bigaramiye, binywera za champagne, ari na ko basimburanwa mu mabanki bajya kubikuza ayo ise azaba yarasahuye rubanda.

Gasasira, Sweden.

Jeannette Kagame Nyiramongi mu bundi busambo bwo guhatira Mayor w'umugi wa Kigali gutegeka abacuruzi bose bahakorera kugura indabyo zo gutereka imbere y'amaduka yabo bacururizamo bigamije guteza imbere ubucuruzi bw'indabyo ze

Mu itohoza ryakozwe n’umuvugizi ryerekana ko uyu mumotsi wa Kagame ariwe umuyobozi Ndayisaba Fideli atari agahato ko gutegeka abacuruzi bakorera ubucuruzi mu mujyi wa Kigali kugura indabyo zonyine mu rwego rwo guteza imbere ubucuruzi bwa Kagame hamwe n’umugore we Jeannette Nyiramongi ahubwo ko noneho banafite indi sosiyete iyoborwa na bamwe muri bamaneko ba perezida Kagame ariyo Great Lakes Communication , Iyi sosiyete ikaba ishinzwe gukora kumanika ibyapa bibarizwa hirya no hino ku mihanda iri mu mugi wa Kigali, ikaba ihagarariwe n’umwe muri bamaneko ba Kagame witwa Gaspard Safari uzwiho kuba yarashegeshe itangazamakuru ryigenga nyuma akagororerwa kuyobora ubu bucuruzi bwa perezida Kagame , iyi sosiyete ikaba ishakirwa amasoko n’umuyobozi w’umugi wa Kigali kubera amabwiriza ashyiraho adasobanutse ariko mu byo kuri akaba nta kindi agamije uretse gushakira iyi sosiyete ya Kagame nanone amasoko mu buryo budasobanutse .

Abacuruzi batandukanye bavuganye n’umuvugizi berekanye akababaro bashyirwaho n’umugi wa Kigali wo kugura indabyo hamwe nibyo baziterekamo , ubu bucuruzi bukaba nta wundi ubufite mu mugi wa Kigali uretse Jeannette Kagame .Ibi bikaba byaranabaye kuri Supermarket y’ahitwa Tanya aho abacuruzi bagera kuri batatu bemezako bategetse kugura izo ndabyo ku gahato.

Umwe mubacuruzi baturiye umugi wa Kigali yadutangarije muri aya magambo “Turarushye kubera aya mabwiriza adasobanutse dushyirwaho na leta ya Kagame igamije gusa kunyunyuza imitsi yacu nta mpuhwe na gato itugiriye. Ni ukubera iki ashyiraho bene ayo mabwiriza aduhatira kugura indabyo ku mugorewe? Niki twamukoze kugera aho atugaraguza agati bene aka kageni? Abana bacu ntabyo kurya bafite , ntibashobora kujya kwiga mu gihe abe bigira mu mashuri ahenze mu mahanga arinako barya ibyo bishakiye , mu gihe twebwe n’udufaranga dushoboye kubona baduhatira kuyatanga mu Gaciro Development Fund , amafaranga yikoreshereza uko ashatse , noneho akaba ageze aho kuduhatira gukorana ubucuruzi n’umugore we Jeannette Nyiramongi , igikorwa kigamije gusahura umutungo wa rubanda arinako barushaho kugira ibya mirenge”

Umwe mubaturage baturiye umugi wa Kigali yadutangarije ko imikorere ya Ndayisaba icuramye cyane ko aho hatira abaturage gutaka indabyo, ni hari mu gishushanyo mbonera cyo umugi wa Kigali bivuzeko hagomba kuzasenywa bityo amugira inama yukwo yabaza akareka umugi wa Kigali ukubakwa hakurikije igishushanyo mbonera cy’umugi wa Kigali abone kuzatanga ayo mabwiriza yo gutaka umugi wa Kigali.

Umwe mubacuruzi bakorera mu mugi wa Kigali yibajije amafaranga batanga aho agana dore ko ubukode mu mujyi wa Kigali buri hagati ya 700.000frw kugera kuri Milioni buri kwezi mu gihe na none abacuruzi baturiye umugi wa Kigali bahatiwe kwimukira mu mutamenwa wa perezida Kagame uhenze , hakiyongeraho imisoro itandukanye iri hejuru harimo iya RRA, umusoro ku bukode hamwe n’indi itandukanye , wakongeraho ibiciro by’umuriro biri hejuru hamwe n’amafaranga y’uguhemba abakozi bigatuma abacuruzi baturiye umugi wa Kigali barushaho gukorera mu gihombo aho kugira ngo bunguke .

Ibi bikaba mu gihe Umuvugizi washoboye gukora itohoza ryerekana ko ingengo y’imari y’umwaka 2012/2013 y’umugi wa Kigali igera kuri miliyari 17 z’amafaranga, umugi wa Kigali ukura mu misoro ku nyungu, ubukode hamwe n’indi misoro basoresha abaturiye umugi wa Kigali mu gihe nanone ubuyobozi bw’umugi wa Kigali buvugako mirongo inani ku ijana y’aka kayabo azibanda ku bikorwa remezo bityo bigatuma abacuruzi bibaza impamvu umugi wa Kigali udakoresha ayo mafaranga aba atanzwe n’abaturage babize ibyuya aho kugira ngo nanone babashyireho andi mategeko yo gutanga andi mafaranga yo kugura indabyo zo gutaka umugi wa Kigali bigamije gusa gushyakira isoko ubucuruzi bwa Jeannette Kagame Nyiramongi.
Gasasira,Sweden

Bakomeje kuryoha hirya no hino mu ngendo bakorera mu mahanga mu gihe ubuzima ku baturage basanzwe mu Rwanda bugenda burushaho kujya i rudubi

Amakuru agera ku Umuvugizi yemeza ko abanyarwanda bakomeje guhangayika cyane bibaza aho ubukungu bw’igihugu cyacu bugana, dore ko kuva tariki ya 12/03/2013 ibiciro bya lisansi na mazutu byiyongereye ku buryo budasanzwe, bikava ku mafaranga 1000frw bikagera ku mafaranga 1500 kuri litiro imwe, aho usanga hirya no hino mu giturage ho ibi biciro biri hejuru cyane, dore ko ba nyiri ama «stations» ya lisansi akenshi baba ari abacuruzi bakorana n’ishyaka riri ku butegetsi rya FPR, ahandi bakaba bakorana na perezida Kagame ubwe.

Nubwo Leta ya Kagame iherutse gusobanura ko izamuka ry’ibyo biciro bya lisansi na mazutu ryatewe n’impinduka yabaye ku isoko mpuzamahanga, amakuru Umuvugizi ufitiye gihamya yemeza ko izamuka ryabyo riterwa n’ihungabana ry’ubukungu bw’u Rwanda ahanini riterwa n’ibihano abaterankunga baherutse gufatira u Rwanda kubera kurema no gushyigikira umutwe w’inyeshamba za M23, umutwe umaze guhitana imbaga y’inzira karengane y’abanyekongo, ukaba waranasize abandi bangara hirya no hino mu bihugu bituranye n’u Rwanda.

Ibi bihano byafatiwe igihugu cyacu, ari na byo byatumye ubukungu bwacyo buhungabana, byatewe n’uburyo perezida Kagame yakoreshaga amafaranga y’abaterankunga batandukanye babaga bageneye u Rwanda, akayashora mu bikorwa byo gufasha inyeshyamba za M23 n’indi mitwe y’iterabwoba yitwaje intwaro muri Kongo, ibi akabikora na none akoresheje ako kayabo mu guhiga impunzi z’abanyarwanda zahungiye hirya no hino mu mahanga, aziziza gusa ko ngo zinenga igitugu ayoboresha abaturage, ari na ko atanga akandi kayabo gaturutse mu misoro y’abanyarwanda mu kumwamamaza hirya no hino mu bihugu by’amahanga.

Itangazo dukesha minisiteri y’Ubucuruzi n’inganda mu Rwanda ryemeza ko ibiciro ku isoko ry’ibituruka kuri peteroli byiyongereye ku kigero cy’10% hirya no hino mu Rwanda, ibi bikaba byaratumye habaho ingaruka ku biciro by’ibiribwa by’ibanze byatungaga abaturage n’ibyo bagemuriraga amasoko.

Andi makuru dukura mu kigo cy’ibaruramibare (National Institute of Statistics) yerekana ko ibiciro ku isoko mu migi itandukanye yo mu Rwanda biziyongera ku kigero cya 5%, wagerekaho n’ibiciro by’ibiribwa ndetse n’ibinyobwa, bigatuma ihungabana ry’ubukungu bw’u Rwanda rishobora kuziyongera cyane muri uku kwezi kwa gatatu, rikava ku 8% aho ryari rigeze muri kwezi gushize, rikaba ryagera kuri 12%.

Amakuru akomeje kugera ku Umuvugizi akaba yemeza ko nubwo izamuka ry’ibituruka kuri peteroli nta ngaruka ryari ryagira ku mamodoka ashinzwe gutwara abagenzi, nyamara amakuru dufite yemeza ko n’ibyo biciro byo gutwara abagenzi bisanzwe biri hejuru ugereranyije n’ibyo mu bihugu duturanye byo mu karere, bikaba na byo bishobora kuziyongera inshuro zirenze ebyiri mu minsi iri imbere.

Umwe mu bahanga mu by’ubukungu wavuganye n’Umuvugizi ku bijyanye n’izamuka ry’ibituruka kuri peteroli, yabidutangarije muri aya magambo : “Izamuka ry’ibituruka kuri peteroli rishobora kugira ingaruka zigaragara ku biribwa kubera izamuka ry’ibiciro mu ngendo, ariko na none hakaba hari n’igihe biterwa n’ihungabana ry’ubukungu bw’igihugu akenshi riba ritewe n’abayobozi b’igitugu nka Kagame baba barabaye ba rusiha rusahuzi, aho amafaranga y’igihugu yakagiriye akamaro abaturage bayashora mu bucuruzi bwabo bwite, bityo abantu bacye bakarushaho gukira, mu gihe rubanda cyangwa indi mbaga y’abanyarwanda igenda irushaho gutindahara, ari na ko abacuruzi bananirwa gukora akazi kabo, kubera ko amasoko hafi ya yose yo mu gihugu aba yarikubiwe na perezida Kagame n’agatsiko k’abatoni be”.
Gasasira,Sweden

Perezida Kagame mu mishyikirano yo kugwatiriza u Rwanda ku isoko ry’uburayi kugirango abone inguzanyo y'akayabo kagera kuri miliyoni 458 z'amadorari ya Amerika, yo gushora mu bucuruzi bwe bwite.

Iyi nguzanyo perezida Kagame arimo kwaka mu bihugu by’uburayi ikaba ari iyo kubaka wa mutamenwa we mushya, duherutse gushyira ahagaragara mu nkuru yacu y’ubushize (Conventional Centre), ubarizwa ahahoze banki ya gisirikare CSS ku Kimihurura no kwagura ibikorwa by’ubucuruzi bw’indi sosiyete ye y’ubucuruzi bw’indege (Rwanda Air), ibi akaba abikora mu gihe abaturage ashinzwe kuyobora bakomeje gutindahara ku buryo bukabije.

Mu gihe ibihugu by’abaterankunga nka Sweden, Ubwongereza, Ubudage, Ubuholandi ndetse n’umuryango w’ibihugu by’uburayi, byahagarikiye inkunga u Rwanda, kubera na none gushora amafaranga aturuka mu misoro y’abaturage mu bikorwa byo gushoza intambara ya M23 no gushyiraho indi mitwe yitwaje intwaro muri Kongo, iyi mitwe ya gashoza ntambara intwaro yayo ya mbere ni ugufata abagore, abana n’abakobwa ku ngufu, kwica urubozo imbaga y’abanye Kongo, abandi bakaba barimo bangara.

Abahanga mu by’ubukungu bavuganye n’Umuvugizi, bagaragaje impungenge kuri ubu bujura perezida Kagame arimo gukora bwo kugwatiriza igihugu ku isoko ry’uburayi, bemeje ko iki gikorwa kizatuma nibura 60% by’abanyarwanda izarushaho gutindahara.

Umwe muri aba bahanga yabitangarije Umuvugizi muri aya magambo : “Ubusanzwe igihugu gitangwaho ingwate kugirango kibone amafaranga yo gushora mu bikorwa bifitiye igihugu akamaro nko guteza imbere ubuhinzi n’ubworozi, uburezi no kubaka amavuriro cyangwa kwishyura imyenda itandukanye igihugu kiba cyarafashe, ariko na none mbere y’uko abashoramari bemera ko igihugu gitangwaho ingwate babanza gukorera icyo gihugu isesengura bakareba ingaruka iryo deni rishobora kugira ku gihugu, impungenge za politiki, ihungabana ry’ubukungu n’inyungu igihugu gishobora gukura muri iryo deni, dore ko urebye nabi icyo gikorwa cyo kugwatiriza igihugu gishobora gutuma igihugu kigurishwa burundu. Ni ukubera iki rero Kagame akorera abanyarwanda igikorwa nk’iki, cyatuma bagurishwa nk’ihene”?

Uyu muhanga mu by’ubukungu yakomeje asobanurira Umuvugizi ingaruka zo kugwatiriza igihugu, ko nta zindi uretse gutuma kigwa mu gihombo ku baturage baba bagomba gutanga imisoro ihanitse kugirango bishyure icyo gihombo. Yabivuze muri aya magambo : “Kugirango igihugu cyo kugwa mu gihombo kubera ideni nka ririya abanyarwanda baba bafashe ku isoko ry’amahanga, hagomba kongezwa imisoro igomba kwishyurwa n’abanyarwanda, iyongerwa ry’imisoro na ryo rigatuma ibiciro ku isoko byiyongera, ingaruka zabyo zikaba ari uko abanyarwanda baba mu buzima buhenze kandi bubagoye cyane”.

Itohoza ryakozwe n’Umuvugizi rikaba ryemeza ko hashobora kubaho ingaruka zikomeye zatuma igihugu kinanirwa kwishyura ideni nk’iryo nyuma yo kugitangaho ingwate, aho bimwe mu bihugu byakigurije bishobora kugishozaho intambara kugirango bikihimureho byishyuza ayo madeni icyo gihugu kiba cyarafashe, hatabuze no gufatira imitungo yacyo iba ibarizwa mu mahanga.

Igitangaje kikaba ari uko, nubwo Perezida Kagame abeshya amahanga n’abanyarwanda ko igihugu cye kigenda kirushaho gutera imbere, ariko amakuru Umuvugizi ukura muri minisiteri y’imari n’igenamigambi akaba yemeza ko u Rwanda ubu ruri mu ikorosi rikomeye ry’ubukungu, aho ubukungu bwarwo butera imbere kuri 4% mu gihe Leta ya Kagame yo igenda ibeshya amahanga ko ubukungu bw’igihugu bwiyongereyeho 8%, naho ihungabana ryabwo rikaba riri ku muvuduko w’igipimo cya 16%.
Gasasira, Sweden.

Igenamigambi Minisitiri Rwangobwa John aherutse gushyira ahagaragara ryarateguranywe ubuswa bukabije, burimo no kudakunda igihugu

Ibikorwa by’ubujura bw’indengakamere byagaragajwe ku wa kane, ubwo minisitiri w’Imari n’igenamigambi, John Rwangombwa, yakoraga agashya, agashyikiriza Inteko Ishinga Amategeko ingengo y’imari yasubiwemo kubera icyuho kinini cyatewe n’ihagarikwa ry’amafaranga y’abaterankunga ku Rwanda. Icyatangaje abanyarwanda kikaba ari uburyo iyo «budget» y’umwaka wa 2012-2013 yasubiwemo, ikagenera ubucuruzi bwite bwa perezida Kagame akayabo kagera hafi kuri miliyoni 340 z’amadorari ya Amerika, umuntu ashyize mu manyarwanda akaba agera kuri miliyari 227. Ayo mafaranga akaba agomba gushorwa mu bucuruzi Kagame yitirira sosiyete y’ubucuruzi Crystal Ventures, mu gihe igihugu cyakabaye kiyashora mu bikorwa rusange bifiteye akamaro abanyarwanda, nk’ubuhinzi n’ubworozi, uburezi cyangwa ubuzima, kugirango mu gihe kizaza u Rwanda byibura ruzabe rufite amavuriro ajyanye n’igihe tugezemo, ugereranyije n’ibihugu birukikije.

Minisitiri John Rwangombwa ntiyatinye gushyira ahagaragara imigambi Kagame afite yo gufata amafaranga aturuka mu misoro y’abanyarwanda n’ay’abaterankunga, ubwo yabivugiraga ku Karunda ko ayo mafaranga agiye gushorwa mu masosiyete bwite ya Kagame nka Rwanda Air perezida Kagame afitemo imigabane igera kuri 90%. Ibi ngo bikaba biri mu rwego rwo kugoboka iyo sosiyete Kagame aherutse kugurira indege nshya, afashe inguzanyo mu mahanga, ariko iyo sosiyete ikaba itaranashoboye kwishyura iyo nguzanyo mu gihe cyari giteganyijwe.

Akandi gashya ni ukuntu perezida Kagame atagize isoni zo gusaba Leta ko imugenera inguzanyo igera kuri kariya kayabo kavuzwe hejuru kugirango agashore mu mushinga w’ubucuruzi bwe bwite, ari wo Rwanda Conventional Centre, mu gihe azi neza ko uwo mushinga wariwe mw’ikubitiro ku buryo amafaranga amaze kuwushoramo aruta umusaruro wari kuzatanga. Ubu bujura ndengakamere bukaba bwarakozwe mu rwego rwa mafia, bukozwe na Mafia Jeannette Kagame, uyu akoresheje minisiiri Musoni James na ambasaderi Gasana Eugène.

Ubwo yahatwaga ibibazo bijyanye n’ihindurwa ry’iyi ngengo y’imari ya Leta, mu gusubiza n’ikimwaro kivanze n’agahinda kenshi, minisitiri John Rwangombwa yagerageje kumvisha abadepite ndetse n’abanyarwanda bari mu cyumba cy’inama, ko «budget» ya Leta yiyongereyeho 24.8% ugereranyije n’imibare yari iteganijwe ingana na 14%; minisitiri Rwangombwa yaje ariko kunanirwa gusobanura neza icyatumye u Rwanda rwohereza ibicuruzwa byinshi mu mahanga, ku buryo abahanga mu by’ubukungu batangarije Umuvugizi ko ikibabaje muri ibi byose ari uko mu mibare y’ingengo y’imari ya Leta yatanzwe icyo gihe, bigaragara ko igihugu cyungutse, kikanabona amadovizi menshi, ariko mu by’ukuri ibyo bicuruzwa minisitiri w’Imari akaba yaratinye kubigaragaza muri raporo ye y’igenamigambi, bikaba nta bindi urestse amabuye y’agaciro perezida Kagame yasahuye muri Kongo, akayagurisha hanze y’igihugu, umusaruro uvuyemo ukaba ntacyo umarira abanyarwanda uretse kujya mu mifuka ye bwite.

Bwana John Rwangombwa yanaboneyeho umwanya wo gusobanurira Inteko Ishinga Amategeko ko hari amafaranga agera kuri miliyari 54.4 z’amanyarwanda yagombaga guturuka mu mifuka y’abaterankunga, ariko Leta ya Kagame ikaba nta cyizere ifite ko ayo mafaranga ikiyabonye, bityo akaba yarakuwe muri «budget» ya 2012-2013. Minisitiri Rwangombwa akaba na none yaratinyutse gusobanura ko habayeho kwibeshya ku mubare w’amafaranga igihugu kinjiza, aturuka mu bikorwa byo kurinda amahoro hirya no hino mu bihugu bitandukanye, aho kuvuga ko mu isanduku ya Leta hinjijwe miliyoni 58, nyamara umubare nyawo ukaba mu by’ukuri ari miliyoni 48.

Nubwo John Rwangombwa yashoboye gusobanura ko amafaranga yagombaga guturuka mu kigo gishinzwe imisoro n’amahôro (Rwanda Revenue Authority), ayakomeje kuboneka agera kuri miliyoni 641 z’amanyarwanda ariko yananiwe gusobanura icyo amafaranga yiswe «Agaciro Development Fund», yakoreshejwe mu gihe ayo mafaranga yagiye yakwa abanyarwanda ku ngufu ariko kugeza magingo aya Minisitiri Rwangobwa akaba adashobora gusobanura aho ayo mafaranga yarigitiye.

Minisitiri Rwangombwa akaba na none yarasobanuriye abadepite ko ibyemezo ibihugu by’abaterankunga, birangajwe imbere na Sweden, Ubudage, Ubwongereza, Denmark, na Banki nyafurika itsura amajyambere hamwe na World Bank , byafatiye u Rwanda kubera gushoza intambara muri Kongo, byatumye u Rwanda rugwa mu cyuho cya «budget» igera kuri miliyari 156.5 y’amafaranga y’u Rwanda.

Igiteye impungenge muri ibi byose bikaba ari uko aho kugirango Leta y’u Rwanda igabanye amafaranga asesagurwa na perezida Kagame, yikodeshaho indege zihenze ugereranyije n’umutungo u Rwanda rufite muri iki gihe, iyongera mu bikorwa bitandukanye birimo nko kumucumbikira mu mahoteri yishyurwa ibya Mirenge ahubwo Leta ya Kagame yamfashe icyemezo kibabaje cyo uguhagarika burundu amafaranga iyo Leta yahembaga abarimu baturuka mu bihugu byo hanze, bigishaga abana b’abanyarwanda ubumenyi bwisumbuyeho, ku buryo mu mwaka wa 2013 Leta y’u Rwanda idafite amafaranga yo guhemba aba barimu, bamwe muri bo bakaba baratangiye kwisubirira iwabo.

Umwe mu bahanga mu by’ubukungu utarashatse ko dushyira amazina ye hanze, yanenze uburyo Leta ya Kagame yateguye iri genamigambi, cyane cyane uburyo yahisemo ibikorwa igomba guha ireme kurusha ibindi, bityo akaba asanga uburyo iri genamigambi ryateguwe na Leta ya Kagame, ryarateguranywe ubuswa bukabije, burimo no kudakunda igihugu, aho abariteguye batagize isoni zo gutera inkunga ubucuruzi bwite bwa Kagame, aho gutekereza ku bikorwa bifitiye rubanda akamaro, nk’ubuvuzi, uburezi, ubuhinzi n’ubworozi.
Gasasira, Sweden.

Uhereye iburyo Mbundu Faustin hamwe na mugenzi we Perezida Kagame basangira Ruswa baka abashoramari batandukanye

Amakuru agera ku Umuvugizi yemeza ko mbere y’aho perezida Kagame yari yahaye umucuruzi, akaba n’inshuti ye magara ntunsige, Mbundu Faustin, inshingano zo kureshya abo bashoramari bagombaga kugura imigabane muri Cimerwa, baguranye na Rwanda Investment Groups (RIG) mu magambo ahinnye y’icyongereza, byakuruye amakimbirane ashingiye kuri ruswa bakwaga, bimuviramo kweguzwa ku mirimo ye yose yakoranaga mo na Perezida Kagame.

Nk’uko byari bisanzwe mu mikorane hagati ya perezida Kagame n’umucuruzi Mbundu, uyu yasabye abashoramari bitwa PPC Cement ruswa y’inyongera ku giciro bagombaga gutanga bagura imigabane muri Cimerwa, baza kubyemeranyaho, icyari gisigaye bikaba byari ugusinya amasezerano y’ubuguzi gusa.

Mu nama yatunguranye yari yahuje abo bashoramari bazwi kw’izina rya PPC Cement, yagombaga kubahuza n’abakozi bakorera urugaga rw’abikorera ku giti cyabo, Mbundu Faustin yari abereye perezida, ibyaje kugaragara nuko ruswa yatswe na Mbundu Faustin, abiziranyeho na Perezida Kagame, bityo muri iyi nama yahuje abo bashoramari, yaba Mbundu Faustin, yaba na perezida Kagame, bakaba nta n’umwe wari uyirimo, amakuru dufitiye gihamya yemeza ko Kagame yari ahagarariwe na Ines Mpambara, ari we muyobozi w’ibiro bya Perezida Kagame muri Perezidansi (Director of Cabinet).

Yaba abakozi bo muri secteur privé, cyangwa muri perezidansi, baje gutungurwa n’ukuntu abo bashoramari babatakambiye, bavuga ko ikiguzi basabwa kugirango bashore imigibane muri Cimerwa bacyemera, ariko bagaragaza inzitizi za miliyoni enye z’amadorali Mbundu Faustin yari yabasabyemo ruswa, iyi ruswa akaba yari kuyigabana na Perezida Kagame.

Amakuru Umuvugizi ufitiye gihamya yemeza ko iyi nama yasoje imirimo yayo nta mwazuro igezeho, ariko Ines Mpambara abwira abo bashoramari ko baba baretse, ari na bwo yaje kubwira perezida Kagame uburyo bari bemeye ibyo basabwaga byose kugirango bagure imigabane muri Cimerwa, ariko ikibazo kikaba icy’izo miliyoni enye z’amadorali Mbundu na Perezida Kagame babasabaga ya ruswa, dore ko abashoramari bavugaga ko badafite uburyo bari gusobanura mu mibare yabo icyo bene ako kayabo bagakoresheje.

Nyuma y’uko Ines Mpambara asobanuriye Perezida Kagame uko abashoramari babakojeje isoni, bakavuga ibya ruswa babakaga, bigaragara ko Mbundu Faustin iyo ruswa atabanje kuyisasira neza ayisaba, ni bwo perezida Kagame yahise amuhamagaza mu biro bye muri Village Urugwiro n’umujinya mwinshi, amubaza impamvu yamutamaje imbere y’abakozi bari aho, bityo anamusaba ko ahita yegura ku mirimo ye yose yari ashinzwe, yaba iyo muri secteur privé cyangwa mu yandi masosiyete y’ubucuruzi yari amuhagarariyemo.

Ku bijyanye n’ayo mafaranga ya ruswa abashoramari basabwaga, Ines Mpambara yababwiye ko bayihorera kuyatanga, noneho bagatanga gusa ayo bari bemeranyijweho yo kugura imwe mu migabane ya RIG iri muri Cimerwa.

Gasasira, Sweden.

Jeannnette Kagame arakataje mu gusahura umutungo wa rubanda akoresheje inzira zitandukanye

Ubwo bujura tukaba twarabuburiye inyito, dore ko bitangaje kubona umufasha wa perezida Kagame yiha isoko ryo kugaburira abasirikare bashinzwe kurinda umugabo we, na we ubwe arimo, ntanagire isoni z’uko rubanda cyangwa abo bashinzwe kuyobora babyakira, aho restaurant ye bwite ari yo yahawe iryo soko, bitananyuze mu mapiganwa.
  
Ikindi kibabaje kandi kinateye agahinda, ni ukuntu Jeannette Kagame atigeze agira isoni z’uko restaurant ye abo yakira ibishyuza ku biciro bihanitse, ugereranyije n’ibiri kw’isoko, ibi bikaba mu gihe perezida Kagame yirirwa abeshya abanyarwanda n’abaterankunga ko ngo arwanya ruswa.

Twanashoboye kumenya ko na none iyi restaurant ya Jeannette Kagame ari yo yihariye isoko ryo kugaburira abanyeshuri ba Green Hills Academy, ibi na none akaba abikora yishyuza ababyeyi bafite abana biga muri iryo nshuri kandi ku giciro kiri hejuru cyane.

Ubu bujura bukaba bumaze kurenga n’ubwa Grace Mugabe wa Zimbabwe, ku buryo ubujura bwa Jeannette Kagame bumaze kwamamara; abahanga bakaba bemeza ko aza no kw’isonga mu bafasha b’aba perezida babarizwa ku mugabane wa Afurika, basahura umutungo wa rubanda batitaye ku bukene bwabo.

Gasasira, Sweden.