Agatsiko kari kayobowe n'umwicanyi Lt Col Tinka niko kaherutse gushimuta Gen Stanislas Bigaruka kamukuye mu rugo rwe ruri ahitwa i Kigoma muri Tanzania

Iki gikorwa cyo gushimuta Gen Stanislas Bigaruka cyakozwe n’umwicanyi ruharwa, Lt Col Tinka, akaba ari we ushinzwe ibikorwa bya gisirikare muri ambasade y’u Rwanda muri Tanzaniya (Military attaché). Agatsiko kari kayobowe n’uyu mwicanyi Tinka kamukuye hafi yo mu rugo rwe ruri ahitwa i Kigoma muri Tanzaniya, dore ko ari yo yari yarahungiye nyuma ya jenoside yo muri 94, ari na ho yari atuye n’abana be.

Iki gikorwa cyo gushimuta Gen Bigarura Stanislas cyabaye ubwo yavaga i Kigoma gusura abana be, agana ahitwa Mweso muri Repubulika Iharanira Demokarasi ya Kongo, ari naho yagombaga kuva agana muri Zambiya, aho yagombaga gusura zimwe mu mpunzi z’abanyarwanda zahahungiye.

Agatsiko kayobowe n’umwicanyi Lt Col Tinka, kabifashijwemo na bamwe mu bashinzwe umutekano muri Tanzaniya, bahise bashimuta Gen Bigaruka, bamushyikiriza urwego rw’ubutasi rwa gisirikare “DMI” ruzwiho ibikorwa by’iyica rubozo, abarugize bakaba ari nabo bakomeje kumwica urw’agashinyaguro muri iki gihe, ku buryo ashobora no kwicwa mu minsi ya vuba inzego z’umutekano za Kagame nizimara kumukuramo amakuru zimukeneyeho.

Igitangaje muri ibi byose ni ukuba igihugu nka Tanzaniya, cyubashywe mu karere nk’igihugu kigendera ku mahame yo kubahiriza uburenganzira bw’ikiremwamuntu, cyemeye gufasha no korohereza umwicanyi ruharwa Lt Col Tinka Faustin gushimuta Gen Bigaruka Stanislas nk’umuntu uzwi ko yari ayoboye umutwe witwaye gisirikare “FDLR”, uhanganye n’ubutegetsi bwa Kagame kandi na none bizwi neza ko igihugu yashyikirijwe kitubahiriza uburenganzira bw’ikiremwamuntu, kandi na none bizwi neza ko kitagira ubutabera, ahubwo ko kihutira kwica kurusha gutanga ubu butabera.

Abantu bose twavuganye bakaba bahuriza ku kintu kimwe ko “nubwo ibikorwa by’umutwe wa FDLR, Gen Bigaruka Stanislas yari ayoboye, na wo utari shyashya kubera ibikorwa byo kubangamira uburenganzira bw’ikiremwa muntu muri Kongo, ariko na none Tanzaniya ikaba yaragaciye kubona yemera kwica amategeko mpuzamahanga agenga impunzi, igafata umuntu wayihungiyeho aho kugirango imuburanishe cyangwa nimba inkiko zayo zitabifitiye ububasha nibura imushyikirize inkiko mpuzamahanga, aho kugirango yorohereze umwicanyi Col Tinka hamwe na bagenzi be kumushimuta bamusubiza mu Rwanda kandi inzego z’umutekano za Tanzania zizi neza ko na maneko za Kagame zishimishwa no kumena amaraso kurusha gutanga ubutabera.

Gasasira, Sweden.

Lt Col Joseph Karegire, amarira ni yose ku basirikare ashinzwe kuyobora kubera guhembwa intica ntikize mu gihe aribo bashinzwe kurinda Umujyi wa Kigali

Mu gihe aba basirikare b’abakomando bafite inshingano zo kurinda umujyi wa Kigali ku bw’umwihariko, ariko amarira yabo akaba ari yose, umwe muri bo wavuganye n’Umuvugizi yabidutangarije muri aya magambo :“Biratangaje kubona tudahembwa kimwe n’abasirikare bagenzi bacu bashinzwe kurinda perezida Kagame kandi tunganya amapeti ya gisirikare, tukaba tunafite inshingano zirusha iz’abo basirikare bashinzwe kurinda perezida Kagame, bakaba baturusha umushahara ugera ku bihumbi birenga magana abiri buri kwezi”.

Ukudahembwa neza kw’aba bakomando bashinzwe kurinda umujyi wa Kigali ni byo byatumye hiyongera ubugizi bwa nabi mu mujyi wa Kigali, dore ko abo basirikare usanga bakoreshwa mu gihe batanafite uburyo bari bugere mu mujyi wa Kigali baturutse mu birindiro byabo byitaruye gato n’umujyi wa Kigali, ku buryo bamwe aho kurinda umutekano bahitamo kwigabiza iby’abaturage kugirango babone uko babaho mu buzima buhenze bwa buri munsi bwo mu mujyi wa Kigali.

Undi mu basirikare babarizwa muri «Special Brigade», utarashatse ko dushyira ahagaragara amazina ye, yabidutangarije muri aya magambo: «Biratangaje kubona Lt Gen Kayonga, mu minsi ishize, yaradutwaye mu masomo yo gukunda igihugu kimwe na bagenzi be bashinzwe kutuyobora, ariko bakiyibagiza ko baba baduhaye inshingano zikomeye zo kurinda umujyi wa Kigali nta n’amafaranga batugeneye nibura yo kunywa no kurya ya buri munsi, dore ko turya ari uko tumaze kugera mu birindiro byacu, tukaba tugera n’aho tubwirirwa, mu gihe ari twe dufite inshingano zikomeye zo kurinda umujyi wa Kigali”.

Aba bakomando bakaba baribajije impamvu y’ikinyuranyo gikabije ku mushahara wabo, n’impamvu bagenzi babo bashinzwe kurinda perezida Kagame ari bo bahembwa umushahara utubutse kurusha abandi kandi abahembwa make banabarusha gukora akazi kagoranye, ku buryo rushati wo mu basirikare barinda Kagame arusha umushahara major ubarizwa muri RDF, bakaba baribajije udashinzwe kurinda perezida Kagame uwo ari we cyangwa ubusugire bw’igihugu ku buryo habaho iri toneshwa n’ivangura rikabije mu bijyanye n’umushahara mu gisirikare cya RDF.

Amakuru agera ku Umuvugizi akaba yemeza ko «battallion» ya «Special Forces» yayoborwaga na Col Nkangura ubu yasimbuwe n’iya Lt Col Kasiyusi nyuma y’aho Umuvugizi usohoreye amakuru afite za gihamya zerekanaga ko izi ngabo za «Special Forces» ari zo zari muri Kongo ziyogoza abaturage b’icyo bihugu, zitwikiriye inyeshyamba za M23, byabaye ngombwa ko zivayo, umuyobozi wazo ari we Col Nkangura akaba yarahawe akaruhuko k’akazi, agasimburwa na Col Karegire.

Gasasira, Sweden.

Zimwe mu ngabo z'uRwanda zakoreraga Loni zirarira ayo kwarika kubera kumara amezi umunani zidahebwa .

Nkuko twabitangarijwe n’umwe mu basirikare batoya, wari ukomotse mu butumwa bwo kurinda amahoro muri Sudani, abasirikare bakomotse mu butumwa bw’akazi muri Darfour mu byumweru bibili bishize, batunguwe no kugera mu Rwanda bagasanga ku ma comptes yabo basanzwe bahemberwaho muri CSS, nta n’urumiya rurangwaho.

Amakuru Umuvugizi ufitiye za gihamya, yemeza ko ingabo zitarashobora guhembwa n’ubuyobozi bwa RDF ari ama battalions ya gisirikare abiri aherutse gutaha aturutse mu butumwa bw’akazi, ayo akaba yarabarizwaga mu bice bya Zam Zam na Zalingei.

Umwe mu basirikare ba RDF, n’agahinda kenshi, yabidutangarije muri aya magambo : “Tumaze igihe cy’amezi agera ku munani tudahembwa; batubwiye ko bazaduhemba nitugera i Kigali; kugeza magingo aya nta n’igiceri twigeze dusanga kuri comptes zacu. Nubwo abayobozi bakuru bacu bakomeza kutwihanganisha, bavuga ko tuzabona umushahara wacu vuba, ariko ukuri nuko Loni yahaye cyera Leta y’u Rwanda umushahara wacu, nyamara ikidutangaza kugeza magingo aya, nuko bataraduhemba”.

Umuvugizi washoboye kubona amakuru afite gihamya yemeza ko Loni yohereza amafaranga ku gihe, buri kwezi, ku buryo ku itariki ntarengwa Leta ya Kagame iba yamaze guhabwa amafaranga y’aba basirikare barinda amahoro muri Sudani. Ukuri kukaba ari uko aya mafaranga y’umushahara wabo ahubwo igisirikare cy’u Rwanda kiyakoresha mu bikorwa bindi bya gisirikare bitandukanye byo kubaka no gushyigikira umutwe w’inyeshyamba wa M23, ukomeje kuyogoza Kongo y’iburasirazuba.

Itohoza twakoze rikaba ryemeza ko buri musirikare muto abona amadorali agera kuri magana atanu buri kwezi, ayo na yo akaba aboneka nyuma y’uko Leta y’u Rwanda imaze kuyakatakata, ugereranyije n’ayo baba bahawe na Loni. Ni ukuvuga ko aba basirikare ba RDF batarahembwa buri wese yishyuza Leta y’u Rwanda amafaranga agera ku bihumbi bine by’amadolari ya Amerika.

Umwe muri aba basirikare batoya, utarashatse ko dushyira ahagaragara amazina ye, yabidutangarije muri aya magambo: “Nubwo tunyura mu nzitizi nyinshi, ariko turitanga kugirango dushobore kugarura amahoro muri Darfour; ibi tukabikorana ubwitange bwinshi ku buryo bamwe muri twe bahasize n’ubuzima; ariko ikibabaje nuko Leta yacu idashima akazi tuba twanakoze, ahubwo igasahura n’utwo twakoreye bitugoye. Ni ukubera iki ?” Uwo musirikare ni uko yibajije.

Abahanga mu bya politiki na gisirikare, bemeza ko kurinda amahoro byafashije cyane mu kugabanya umwiryane wari mu gipolisi no mu gisirikare cy’u Rwanda, cyane cyane kubera uyu mugisha babonye wo kujya gukora akazi ka Loni, kabahemba neza kandi kakanabafata neza.

Kugirango tumenye ukuri kw’ibivugwa kuri aba basirikare bo muri Darfour, twashoboye kuvugana n’umuvugizi wa gisirikare cy’u Rwanda, Brig Gen Joseph Nzabamwita, kugirango tumenye niba koko aba basirikare bamaze amezi umunani badahembwa, maze adusubizanya ubwirasi, muri aya magambo : «Ariko Gasasira, tuvuge ko koko ari imbabazi ugiriye aba basirikare ? Ese ni aba basirikare ubwabo babibabwira»?

Gasasira, Sweden.

Polisi ya Afurika y'Epfo ishinzwe kurwanya iterabwoba yataye muri yombi zimwe mu nyeshamba za M23 kubera kuvogera Ubutaka bwayo mu buryo butemewe na mategeko .

Inyeshyamba za M23 ni umutwe w’abarwanyi ushyigikiwe, ukanaterwa inkunga n’umunyagitugu w’u Rwanda, Perezida Paul Kagame. Uyu mutwe ukorera ibikorwa byawo by’iterabwoba muri Repubulika Iharanira Demukarasi ya Kongo, wibasira abasiviri, ugahungabanya uburenganzira bw’ikiremwamuntu, ugafata abagore n’abakobwa ku ngufu, ukanasahura bitemewe n’amategeko umutungo kamere wa Kongo-Kinshasa.

Amakuru Umuvugizi ukesha ushinzwe itsinda rya polisi ryo muri Afurika y’Epfo rishinzwe kugenzura ibikorwa by’iterabwoba, Brigadier L. Lindela Mashigo, yemeza ko «kuri uyu wa 05 gashyantare 2013, aba bafashwe bari bagamije gukora ibikorwa by’iterabwoba no guhungabanya umudendezo wa Leta w’igihugu cya Afurika y’Epfo», mbere yo kongeraho ko «abakekwaho iki cyaha uko ari 19 bapangiraga ibyo bikorwa mu karere kitwa Limpopo».

Inzego zishinzwe ubutasi za Afurika y’Epfo, zanemeje ko ifatwa ry’aba bantu ryari rikurikiwe n’amaperereza yari amaze igihe abakorerwaho mu mezi menshi ashize, abafashwe bakaba banaregwa ibikorwa byo gushaka guhirika ubutegetsi bwo muri Repubulika Iharanira Demukarasi ya Kongo.

Abakurikiranira hafi ibya politiki, bemeza ko ifatwa ry’aba bantu ari umuzigo ukomeye ku butegetsi bwa Kigali kuko abafashwe bashobora kumena amabanga y’ukuntu u Rwanda rufasha umutwe w’iterabwoba wa M23 urimo kuyogoza uturere twinshi two muri Kongo-Kinshasa.

Amakuru dukesha inzego z’ubutasi za Perezida Kagame yemeza ko ifatwa ry’izi nyeshyamba ze ryateye impagarara n’impungenge muri izi nzego, kubera ko abazikuriye barimo kwibaza uko biri bugende niba abafashwe bari bumene amabanga yerekeranye no kwivanga kwa Leta y’u Rwanda mu ntambara irimo kubera muri Kongo.

Mbere y’uko aba bantu bafatwa, zimwe mu nshingano bari bahawe n’inzego z’ubutasi za Perezida Kagame, zarimo no gushakisha uburyo bushoboka bwose bwo kuzivugana bamwe mu batavuga rumwe na Leta y’u Rwanda, bahungiye iki gihugu muri Afurika y’Epfo.

Aba basirikare b’inyeshyamba uko ari 19 bamaze gufatwa, biteganijwe ko bazashyikirizwa urukiko rw’i Pretoria, aho bashobora kuzaregwa ikindi cyaha gikomeye cyo kuvogera ubusugire bw’ikindi gihugu cy’amahanga.

Amiel Nkuliza , Sweden.

Indege zitagira abadereva, zizwi kw’izina rya «drones»

Minisitiri Lambert Mende yadutangarije ko izo ndege za Loni zizafasha ingabo z’amahanga mu kubona amakuru y’ibikorwa by’umwanzi no kumenya aho uwo mwanzi aturuka, akaba yaranadutangarije ko izo ndege zizakoreshwa cyane mu kugenzura imipaka y’u Rwanda na Uganda, aho ihana imbibi n’igihugu cya Kongo, bityo bikazabafasha guhashya uwo mwanzi mu buryo bworoshye.

Tumubajije aho amafaranga yo gutunganya icyo gikorwa azaturuka, dore ko ibihugu bimwe bya Afurika byemeye kohereza ingabo zabyo kuza gufatanya n’izari zihasanzwe za Monusco, ariko zari zigifite ikibazo cy’amafaranga, Lambert Mende yadutangarije ko hemejwe ko icyo gikorwa kizatwara miliyoni ijana z’amadorali y’abanyamerika kandi ko Leta ya Kongo nk’igihugu kirebwa n’icyo kibazo cy’umutekano mucye, yiyemeje gutanga makumyabiri na gatanu kw’ijana y’ayo mafaranga, akaba angana na miliyoni makumyabiri n’eshanu z’amadorali ya Amerika, kandi Leta ya Kongo ikaba yararangije kuyatanga.

Bwana Lambert Mende yanaboneyeho umwanya wo kudusobanurira ko Leta ya Kongo-Kinshansa yiteguye gukorana n’ingabo z’amahanga, bakazafatanyiriza hamwe nk’umutwe umwe uzaba witeguye guhashya inyeshyamba za M23, zikomeje kwisasira imbaga y’inzirakarengane y’abaturage ba Kongo, abandi bagasigara bangara mu bihugu bituranye na Kongo.

Ku bijyanye n’undi mutwe wadutse wiyita Mai Mai Nyatura cyangwa M26, uherutse kuvugwa muri Kongo, Minisitiri Lambert Mende yadutangarije ko uwo mutwe ntacyo ubatwaye, kandi ko nta ngufu ufite, uretse izo uhabwa n’itangazamakuru. Yatubwiye ko ingabo za Kongo (FARDC) zirimo guhashya uwo mutwe bwa nyuma, ku buryo nta nkeke ukwiriye gutera abaturage ba Kongo, akaba yaranaboneyeho umwanya wo kudutangariza ko Leta ye ifite amakuru ahamya ko n’uwo mutwe uhabwa ingufu na kimwe mu bihugu bituranye na Kongo, nk’uko gikomeje gutera inkunga M23 mu bikorwa byayo bibisha byo guhungabanya umutekano wa Kongo.

Gasasira, Sweden.

Hervé Ladsous,ushinzwe ibikorwa byo kubungabunga amahoro mu Kanama ka Loni gashinzwe Umutekano

Mbere y’uko iki cyemezo gifatwa, Umunyamabanga mukuru wa Loni, Ban Ki-moon, yari yarandikiye ibihugu cumi na bitanu bigize Akanama ka Loni gashinzwe Amahoro ku isi, asaba ko ingabo za Loni zisanzwe muri Kongo-Kinshasa zakoresha izo ndege zitagira abazitwara kugirango ikibazo cy’umutekano muke kimaze amezi agera kuri icyenda muri Kongo, ikibazo cyatewe n’intambara y’abarwanyi ba M23, kirangire burundu.

Mu ibaruwa yagejeje ku munyamabanga mukuru wa Loni isubiza icyifuzo cya Ban-Ki moon, ushinzwe ishami rishinzwe umutekano mu Muryango w’Abibumbye, umunyepakistani Ambasaderi Masood Khan, yatangaje ko icyifuzo cy’Umunyamabanga mukuru wa Loni gifite ishingiro kandi ko gikwiye gushyirwa mu bikorwa.

U Rwanda, rwari rwatangiye muri uku kwezi manda yarwo y’imyaka ibiri mu Kanama gashinzwe Amahoro ku Isi, rwari rwaramaganye ko izi ndege zohererezwa muri Kongo, ruvuga ko Afurika idakwiye kuba icyambu cy’indege z’abanyamahanga zikora akazi k’ubutasi, mu gihe ibihugu by’Uburusiya n’Ubushinwa byo byari byagaragaje impungenge zabyo ku ikoreshwa ry’izo ndege mu turere two muri Kongo-Kinshasa.

Ushinzwe ibikorwa byo kubungabunga amahoro mu Kanama ka Loni gashinzwe Umutekano, bwana Hervé Ladsous, yari yatangaje muri uku kwezi kwa mbere ko Loni yagombye kwemerera izo ndege zitagira abaziyobora, koherezwa muri Kongo-Kinshasa kugirango zibungabungeyo umutekano.

Naho uwahoze ari umukuru w’ingabo z’Umuryango w’Abibumbye zo kubungabunga amahoro muri Kongo-Kinshasa, Alan Doss, na we yari yasabye kuva mu mwaka wa 2008 Akanama ka Loni gashinzwe amahoro ku isi, ko izi ngabo zakoherezwa vuba na bwangu muri Kongo, nyamara icyifuzo cye cyubahirijwe nyuma y’uko inyeshyamba za M23 zifatiye umugi wa Goma, zamazemo iminsi igera kuri cumi n’umwe yose. 

Amiel Nkuliza, Sweden.

Lt Gen Karenzi Karake, Maneko Mukuru

Amakuru Umuvugizi ukura mu nzego z’ubutasi za Uganda n’u Rwanda, yemeza ko ba maneko ba Kagame bari bamaze iminsi bagenda kuri uyu mucuruzi wakoraga akazi k’ubuvunjayi, bamurega gukora ibikorwa bibangamiye ubutegetsi bwa Kagame,  ari bwo zaje kumutega avuye i Kigali, zimwica urupfu rw’agashinyaguro, ubwo  zamutwikaga ari muzima. Uyu mucuruzi uturuka mu gihugu cya Uganda akaba abaye uwa cumi inzego z’ubutasi za Kagame zimaze kwisasira mu buryo butandukanye.

Nyakwigendera Dickson Tinyimondi yiciwe ku muhanda ugana i Gatuna, ku mupaka w’u Rwanda na Uganda, ahitwa i Gaseke mu murenge wa Gicumbi, akagari ka Rutare, aho yaje gutwikirwa ku karubanda, muri metero nkeya uvuye kuri kaburimbo. Abicanyi ba Kagame bamukuye mu mudoka ye, barangije bamutwika ari muzima.

Nubwo inzego z’ubutasi z’u Rwanda zakwirakwije ibinyoma ko abishe uwo mucuruzi bari bagamije kumwambura amafaranga, abaturage bari hafi y’aho icyo gikorwa cy’ubugome cyabereye, bemeza ko nta wundi muntu wari gutinyuka kwica uyu mucuruzi, agahagarika imodoka ye, yarangiza akayimukuramo, akanamwambura imyenda yari yambaye, kugeza ubwo amutwika, icyo gikorwa kigakorerwa ku muhanda wa kaburimbo ufite urujya n’uruza rw’abasirikare n’bapolisi, uretse inzego z’ubutasi za perezida Kagame doreko kwica zabigize umwuga. 

Nkuko bisanzwe bigenda iyo abantu bishwe n’inzego z’ubutasi z’u Rwanda, polisi y’igihugu yahise itanguranwa, itangaza ko yafashe abagize uruhare muri icyo gikorwa, nk’aho yari isanzwe ibabitse mu biro byayo. Abazi imikorere y’inzego z’ubutasi za perezida Kagame, bamaze kubimenyera, dore ko ari ko byagiye bigenda no ku bantu bagiye bicwa n’izo nzego ku mabwiriza ya perezida Kagame, nka Nyakwigendera Rugambage Jean Leonard, wari umwanditsi mukuru wungirije w’inkinyamakuru Umuvugizi, kimwe n’abandi bagiye bicwa muri ubwo buryo, aho izo nzego z’ubutasi za perezida Kagame zagiye zitegura bamwe mu bacanyi bazo, zikanabatoza ibyo  kwiregura bya nyirarureshwa, igihe babaga bageze mu maboko y’ubutabera bw’u Rwanda.

Nta soni cyangwa ikimwaro byateye, umuvugizi wa polisi y’u Rwanda, Theos Badege, yahise atangaza iby’urwo rupfu muri aya magambo :  “Twabafashe ku wa mbere, kandi uko ari bane bose, biyemereye icyaha, bavuga ko bari bagamije kumwambura amafaranga yari yitwaje”.

Nkuko na we akunze gusubizanya ubwitonzi bwuzuye dipolomasi, ambasaderi wa Uganda mu Rwanda, Hon Richard Kabonero, yashyize aya magambo kuri twitter ye, agira ati :  “Nakiriye ifungwa ry’abo bicanyi bakoze igikorwa cya bunyamaswa, ariko ndanasaba ko habaho iburanishwa rinyuze mu mucyo kugirango abakoze iki gikorwa, bakanagishyira mu bikorwa, bahanwe”.
Gasasira, Sweden

Lt Gen Karenzi Karake , Maneko Mukuru kimwe na bagenzibe bakwiriye gushyikirizwa inkiko bagasobanura ubwicanyi butandukanye bagiye akorera imbaga y’inzirakarengane z'abasiviri

Kuba perezida Kagame yaratinyutse kugarura mu kazi Gen Karenzi Karake mu mwanya nk’uriya ukomeye kandi yari azi neza ubwicanyi butandukanye yagiye akorera abanyarwanda intambara ikirangira, ubwo yari umukuru w’urwego rw’ubutasi bwa gisirikare (DMI), urwego rwisasiye imbaga y’inzirakarengane z’abasiviri bo mu bice bitandukanye by’igihugu, bisobanura ko perezida Kagame yamugaruye muri iki gihe kuyobora urwego rukuru rw’ubutasi kugirango yongere amukoreshe bwa bwicanyi yamukoresheje jenoside ikirangira, kugeza mu mwaka w’1998.

External Security: Perezida Kagame na none yaje gutungura abantu ubwo yahagarikaga umwicanyi Col Dan Munyuza ku mwanya w’urwego rushinzwe ubutasi bwo hanze y’igihugu, akamusimbuza undi mwicanyi ruharwa Col Francis Mutiganda. Ibigwi bya maneko Col Francis Mutiganda bikaba bizwi na none jenoside yakorewe abatutsi ikirangira, aho yagiye yisasira imbaga y’inzirakarengane z’abaturage bari barahungiye ubwicanyi bw’ingoma y’abatabazi ahitwa i Kabuga mu nkengero z’umugi wa Kigali, Col Mutiganda icyo gihe wari ushinzwe «Counter Intelligence» mu buyobozi bw’urwego rushinzwe ubutasi bwa gisirikare (DMI), yaje kwisasira imbaga y’inzirakarengane z’impunzi zari zarahungiye ahongaho i Kabuga, aho yagendaga atoranyamo abanyarwanda yishakiye bari bahungiye muri ibyo birindiro by’inkotanyi, akagenda abica urw’agashinyaguro.

Ikibabaje muri ibi byose nuko ubu Col Francis Mutiganda, wishe imbaga y’inzirakarengane, atarafatwa ngo ashyikirizwe ubutabera kubera ubu bwicanyi yagiye akorera abanyarwanda muri kiriya gihe, ahubwo perezida Kagame akaba yaragiye amugororera imyanya itandukanye haba muri Loni, akaba yarigeze no kumuha umwanya wo kuyobora urwego rushinzwe ubutasi bwo hanze, bisobanura ko Perezida Kagame kumugororera  kuyobora uru rwego rushinzwe kuneka i bihugu by’amahanga kandi azi amateka ye y’ubwicanyi, bivuga ko yiteguye gukomeza kumukoresha na none mu bwicanyi bukorerwa hirya no hino mu bihugu by’amahanga, aho impunzi z’abanyarwanda zagiye zihungira ingoma y’igitugu ya Perezida Kagame.

Directorate of Military Intelligence: Perezida Kagame na none yeretse abanyarwanda ko Leta ye igeze mu bihe bikomeye by’ubwicanyi no kumena amaraso y’inzirakarengane, ubwo na none yafataga umuntu nka Col Franko Rutagengwa akamuha kuyobora urwego rw’ubutasi rwa gisirikare, asimbura igikoresho cye na none yagiye akoresha mu bwicanyi butandukanye, ari cyo Gen Rutatina, mu gihe yari azi neza ko Col Rutagengwa Franko yagiye akora ubwicanyi butandukanye mu bihugu bya Afurika nka za Congo-Brazzaville, Malawi, Zimbabwe na Congo-Kinshansa, aho yagiye yica impunzi z’abanyarwanda zitandukanye akoresheje inzira zitandukanye, kumufata bikaba byaragiye bigora inzego zishinzwe umutekano muri ibyo bihugu, dore ko yabaga yakoresheje impapuro z’inzira zitari mu mazina ye, kandi akaba yarabaga anitwaje passport z’ibindi bihugu bikikije u Rwanda. Ukurikije ibigwi bya Col Franko Rutagengwa, nta gushidikanya ko perezida Kagame yamushinze kuyobora urwego rw’ubutasi rwa gisirikare kugirango akomeze wa mwuga we w’ubwicanyi, yisasira imbaga y’inzirakarengane z’abasiviri, yaba mu Rwanda cyangwa mu bihugu by’abaturanyi nka Kongo-Kinsansa.

Special Intelligence: Nubwo perezida Kagame atayobewe ko urwego rushinzwe iperereza rya polisi ari rwo Special Intelligence, rukwiriye kuyoborwa n’abapolisi babigize umwuga, bakaba baranize amahame agenga uburenganzira bw’ikiremwamuntu, yabirenzeho yimurira umwicanyi ruharwa, ari we Capt Kalisa Faustin, wakoraga mu biro bishinzwe iperereza rya girikare (DMI), anamuzamura mu ntera aho yagizwe Assistant Commissioner of Police, ushinzwe iperereza muri polisi y’u Rwanda. Umwicanyi ACP Kalisa yeretse perezida Kagame Kagame ko ari umwicanyi wabigize umwuga ubwo yayoboraga igikorwa cyo kwica abaturage babicishije ibisasu muri 2010, mu bihe byabanzirizaga amatora y’umukuru w’igihugu, bikaba byari mu rwego rwo kwigizayo abatavuga rumwe n’ubutegetsi hamwe no gutera abaturage ubwoba kugirango ntibazivumbure ubwo perezida Kagame yabeshyeraga abanyarwanda ko bamutoye.

Umwicanyi Kalisa Faustin ntateze kwibagirana mu mateka y’igihugu cyacu aho we na Lt Col Karagwa John bari bafatanyije kuyobora ishami mu rwego rw’iperereza rya gisirikare (DMI) ryitwa  “Counter Intelligence”, aho bagiye bisasira imbaga y’inzirakarengane zirimo n’abasirikare b’igihugu bagiye bicirwa mu bice bitandukanye by’u Rwanda, ndetse no mu kigo cya gisirikare cya Kami.

ACP Kalisa akaba yarimukanye ya ngeso ye yo kumena amaraso yari amenyereye gukorera muri DMI, ayimukana mu gipolisi gishinzwe ubuzima bw’abaturage bwa buri munsi, ari na yo mpamvu ubwicanyi, ugufunga bidasobanutse no gushimuta inzirakarengane z’abasiviri, byiyongereye mu Rwanda.

Kuba perezida Kagame yaragennye abicanyi nk’aba kuba ari bo bayobora inzego z’iperereza rye mu gihe cy’amahoro nk’iki, binyubutsa ya magambo yigeze kwivugira mu kiganiro n’abanyamakuru muri 2008, ubwo bamubazaga icyo atekereza kuri manda zatanzwe n’umucamanza wo muri Espagne, mandat zashakishaga abasirikare be kubera ubwicanyi butandukanye bagiye bakorera abanyarwanda. Icyo gihe Kagame yasubije muri aya magambo : “Sinibaza icyo abo bacamanza bo mu bihugu by’uburayi badushakaho; aho kugirango bashyire abo basirikare ku rutonde babarega ubwicanyi butandukanye, bakabaye ari jyewe babibaza mbere, cyane cyane ko abaregwa bose icyo gihe babikoraga ku mabwiriza yanjye”.

Gasasira, Sweden.

ACP Gatete Cyprian niwe washize mu bikorwa igikorwa cy'ukwica mugenziwe Supretendant Camarade Rukabu.

Nk’uko bamwe muri za maneko za Kagame, banakoranye na Nyakwigendera Rukabu Camarade, batangarije Umuvugizi, bemeza ko amabwiriza yo kumwica yatanzwe n’umwicanyi ruharwa, ari we ACP Kalisa Faustin, ari na we uyoboye urwego rw’iperereza muri Polisi y’igihugu, urwego rukunze kwitwa kwa Gakinya, akaba ari we watanze amabwiriza ku bapolisi bari bayobowe na ACP Gatete Cyprian, dore ko yari n’inshuti magara ya Nyakwigendera Camarade Rukabu.

Ibi byabaye ku mugoroba wo ku ya 19/12/2012, ubwo bari mu nzira bava i Darfur, bamaze kugera ku kibuga cy’indege cya Entebbe muri Uganda, bamushyirira mu cyo kunywa bwa burozi bwa Col Dan Munyuza, akiri umuyobozi w’urwego rw’ubutasi rwa gisirikare (DMI), akaba yarigeze kwivugira ko bwiciraho kandi bunakomeye ku buryo n’abaganga iyo basuzumye umurambo w’uwo babugaburiye, badashobora gupfa babonye ibimenyetso by’uko yishwe.

Uyu mugambi wo kwivugana Supretendant Rukabu washyizwe mu bikorwa n’agatsiko k’abapolisi bakuru bagenzi be bari bayobowe na ACP Gatete Cyprian, ku mabwiriza ya perezida Kagame ubwe, dore ko nta kuntu urwego rw’ubutasi rwa polisi rwajyaga kwica umuntu wahoze ari umupolisi mukuru, perezida Kagame atabizi. 

Mbere y’uko yicwa, Nyakwigendera Supretendant Camarade Rukabu yari yarahamagajwe n’urwego rw’ubugenzacyaha (Criminal Investigations Department), mbere gato y’uko ajya mu butumwa bw’akazi ko kurinda amahoro muri Darfur. Icyo gihe yabazwaga ibirego bihimbano bari bamutwerereye ko anenga Leta ya Kagame, urwo rwego rukaba rwaraje kumuha ubutumwa buvuye kwa perezida Kagame, bumwihanangiriza kutazongera kunenga ubutegetsi bwe mu ruhame. 

Imana yakire mu bayo Nyakwigendera Supretendant Camarade Rukabu, kandi imuhe iruhuko ridashira.

Gasasira, Sweden.

Hyabene James, Uhagarariye Ikinyamakuru The Independent mu Rwanda arafunzwe azira amaherere .

Ifungwa rya James Hyabene ryabaye ku mabwiriza y’ikigirwamana cya Kagame, Andrew Mwenda, ari na we muyobozi mukuru akaba na nyir’iki kinyamakuru. Andrew Mwenda yandikiye umuyobozi mukuru wa Polisi y’u Rwanda, Gen Gasana Emmanuel, amusaba ko mugenzi we wari umuhagarariye mu Rwanda, afungwa atararenga umupaka w’u Rwanda na Uganda. James Hyabene yagombaga kujya kwizihiriza iminsi mikuru ya Noheli muri Uganda.

Andrew Mwenda, nk’umwe mu bajyanama ba perezida Kagame, akaba n’inshuti magara y’umuryango we, yatanze amabwiriza ko mugenzi we afungwa, aregwa ibirego by’ibihimbano by’ubujura. Kubera igitutu, Polisi y’u Rwanda yaje kumuta muri yombi, urwego rushinzwe ubugenzacyaha rutaranamukorera igenzura.

Itohoza ryakozwe n’Umuvugizi ryemeza ko abo banyamakuru bombi ba «The Independent» baje gupfa amafaranga y’ishyaka riri ku butegetsi rya FPR, ubwo ryabahaga ikiraka cyo kuryamamaza mw’isabukuru yaryo y’imyaka makumyabiri n’itanu rimaze rivutse, bityo icyo kinyamakuru kikaba cyaragiye vuba na bwangu gucapisha numero special yacyo muri Kenya, kugirango inkuru cyari cyanditse zisingiza perezida Kagame n’ishyaka rye, zigere kw’isoko ku munsi wo kwizihiza isabukuru y’imyaka 25 ya FPR.

Ako kayabo aba banyamakuru bombi bahawe na Leta ya perezida Kagame kugirango bajye gucapisha inyandiko zimusingiza, ni ko baje kuryaniramo, ubwo James Hyabene yavugaga ko gucapisha ibyo binyamakuru byamutwaye ibihumbi icumi na bitatu by’amadolari, Andrew Mwenda we akaba yaravugaga ko byakagombye gutwara ibihumbi birindwi gusa. Uku kutumvikana ku biciro byakoreshejwe mu kwandikisha ikinyamakuru cyabo, ni byo byatumye Andrew Mwenda asaba polisi y’u Rwanda gufata mugenzi we, kuko yakekaga ko yanyereje akayabo mu icapisha ry’iki kinyamakuru.

Nubwo ubusanzwe umuntu uregwa kunyereza amafaranga afungwa nibura habayeho «internal audit», polisi na yo igashingira kuri iryo genzura mbere yo guta muri yombi uregwa, si ko byaje kugenda, dore ko imikorere ya polisi y’u Rwanda icuramye kuko ifunga umuntu nta dosiye cyangwa ikirego gifatika, ibimenyetso bikaba bishakwa mu gihe uregwa aba arimo kuborera mu buroko.

Kugeza ubu twandika iyi nkuru, James Hyabene afungiwe kuri Station ya Brigade ya Kicukiro, aho akomeje guhatwa ibibazo na polisi y’u Rwanda, mu gihe Andrew Mwenda we arimo gukora aho bwabaga kugirango akomeze gushakira ibindi birego mugenzi we, agamije kumuheza mu buroko.

Gasasira, Sweden