Leta isanzwe itubahiriza Uburenganzira bw’ikiremwamuntu izubahiriza ubw’ abacyekwaho jenoside?
Bamwangiye kujya Kwivuza!
Maze iminsi nitegereza uburyo leta y’u Rwanda hamwe na Komisiyo ya Jenoside ishamikiye kuri iyo leta, bivuga ko binejejwe n’uko ubutabera bwo muri Norvège, bwafashe icyemezo, cyo kwohereza Bandora ushinjwa Jenoside mu Rwanda. Kuba uyu Bandora yakoherezwa kuburanira mu Rwanda, byatumye nibaza byinshi ku bijanye n’ubwigenge bw’ubutabera bw’u Rwanda n’iyubahizwa ry’uburenganzira bwa muntu mu Rwanda, binasanzwe bikemangwa n’imiryango mpuzamahanga iharanira uburenganzira bw’ikiremwamuntu.
Bimwe mu bintu nabanje kwibaza” nimba ubutabera bw’ igihugu cya Norvege buzi ishusho nyayo y’ubutabera bw’u Rwanda n’uburenganzira bwa muntu hamwe n’imibereho y’imfungwa mu magereza y’u Rwanda?”
Nanibajije byinshi ku bijyanye n’aba bantu baregwa Jenoside. Muri iki gihe, leta ya Kagame yagize “Jenoside” nk’intwaro ya Politiki. Aho bamwe mu bacyekwaho jenoside, bemeye kumuyoboka badakurikiranwa. Naho abayikoze bakatiwe, bakaba bafunzwe nabi, k’uburyo imiryango yabo itabona uburenganzira busesuye ku bijyanye no kubagemurira kandi iyo leta idashoboye kubahaza mu biribwa.
Na none kimwe mu byatumye nibaza cyane, ni ikibazo cy’ukuntu leta yananiwe gutanga ubutabera nyabwo ku banyapolitiki cyangwa izindi mfungwa zizira amatiku na munyumvishirize: nka ba Ntakirutinka Charles ,Ingabire Victoire, Ntaganda Bernard , abanyamakuru nka Nkusi Uwimana Agnes, Mukakibibi Saidati, abasirikare bayikoreye nka ba Col Semana Paul ,Col Mudenge ,Kalisa Mupende, Capt Musekera, Murenzi Janvier, Lt Col Rugigana Ngabo hamwe n’abandi benshi, buzashobora bute kuburanisha bukanaha ubutabera nyabwo bamwe mu baregwa Jenoside icyaha kiremeye kurusha ibindi ku isi.
Ese leta ya Kagame idashobora kurekura umuntu wakabaye wubashywe mu gihugu kurusha abandi, kubera ko yabayeho perezida w’igihugu , ariko bakaba baramwangiye kujya kwivuriza mu mahanga, iyo leta yashobora gute kurenganura uregwa Jenoside?
Biratangaje kubona ubutabera bwa Norvège, igihugu cyubashywe mu bihugu bya mbere biharanira uburenganzira bw’ikiremwamuntu, kuba butazi ko u Rwanda ruri mu bihugu bihonyora uburengazira bwa muntu aho buva bukagera. Iyo bigeze ku mfungwa ho biba agahomamunwa. Byigaragaza iyo zifunguwe aho ziba zimeze nk’izifite ibyo zahawe muri gereza bizihumanya. Gihamya ni ukuntu perezida Bizimungu Pasteur yafunguwe ameze.
Kuba hari amaraporo yakozwe n’imiryango iharanira uburenganzira bw’ikiremwa muntu nka Amnesty International na Human Rights Watch, zigaragaza ishusho y’ukuri y’ubutabera bw’u Rwanda, byari ikimenyetso ku mahanga, yo kutohereza abantu mu Rwanda kuhaburanira cyangwa kuhafungirwa.
Ubutabera bw’ igihugu cya Norvege, bukwiye kutagwa m’umutego wo kwohereza iyo mfungwa icyekwaho Jenoside mu Rwanda. Bwakwiye kumuburanisha bukamukatira urumukwiye. Bwasanga amategeko yabo atabwemerera kumuburanisha, bukamwohereza mu nkiko z’uburayi cyangwa muri TPIR muri Arusha.
Kagabo, London .