Jean-François Julliard yasezeye k’ubunyamabanga bukuru bwa «Reporters sans frontières».

Umuryango urengera ubwisanzure bw’itangazamakuru ku isi «Reporters sans frontières» uramenyesha impinduka mu bagize ikipe y’ubuyobozi. Jean-François Julliard, wari umunyamabanga mukuru wa «RSF» ntazaba agishinzwe uyu murimo kuva taliki ya 31 mutarama 2012. Inama y’ubutegetsi yatangiye gushakisha uzamusimbura kuri uwo mwanya. Olivier Basille, wari uhagarariye «Reporters sans frontières» i Buruseli, ni we uzaba akora iyi mirimo kugeza hashyizweho uzasimbura Jean-François Julliard.

Dominique Gerbaud, perezida wa «Reporters sans frontières», ati: « Abakozi n’inama y’ubutegetsi dushimiye byimazeyo Jean-François kubera akazi gakomeye yakoreye umuryango, akazi ko kurengera ubwisanzure bw’itangazamakuru. Ubwitange bwe n’ubushobozi byahaye agaciro gakomeye «Reporters sans frontières» mu myaka itatu ishize.»

Naho Jean-François Julliard we, ati «Mvuye muri «Reporters sans frontières» mu gihe umuryango wari umaze gukomera. Nkaba nshimishijwe n’intambara twarwanye mu minsi ishize. Ugutera imbere ku buryo bugaragara k’umuryango, kwerekeranye n’uburenganzira bw’itangazamakuru, haba mu Bufaransa cyangwa mu Burayi, ni byo byabaye impinduka ikomeye y’umuryango. Tumaze gukingura, ku nshuro ya mbere, ibiro muri Tuniziya, tugiye guha imbaraga ibikorwa byacu muri Libiya, kandi ndizera ko iri terambere rizakomeza.»

Jean-François Julliard yakoreye «Reporters sans frontières» kuva mu mwaka w’1998. Nyuma yo kwiga ibijyanye na «Cinema» ndetse na «audiovisuel», akaba yari afite impamyabushobozi ya «DESS» mu itangazamakuru, yabaye umushakashatsi kuri Afurika, anashingwa ubushakashatsi bw’umuryango muri 2004. Yabaye umunyamabanga mukuru mu mwaka wa 2008. Yari yongeye gutorerwa indi manda y’imyaka itanu mu kwezi k’ukuboza, 2010.

Ku wa mbere gashyantare 2012, ni ho azatangira imirimo ye mishya yo kuba umuyobozi mukuru wa «Greenpeace France».
Amiel Nkuliza, Sweden.