Reporters sans frontieres ivuga ko iyimurwa ry’urubanza rwa Hassan Ruvakuki ari ugusuzugura uburenganzira bw’uregwa n’abamwunganira.

Ku wa 10 gashyantare 2012, urukiko rw’ubujurire rwa Gitega i Bujumbura, rwanze gusuzuma inyandiko rwashyikirijwe n’ababuranira umunyamakuru wa Radiyo Bonesha FM, uyu akaba anahagarariye i Bujumbura radiyo mpuzamahanga y’abafaransa (RFI). Nyuma y’uko yimuwe mu magereza inshuro zigera kuri eshatu, Hassan Ruvakuki ubu noneho afungiwe i Muramvya.

Kuva urubanza rwa Hassan Ruvakuki rutangiye, urubanza aregwamo ibikorwa by’iterabwoba, byagaragaye ko ibi birego bishingiye ku marangamutima na politiki. Urubanza rwagaragayemo ukutiyizera n’ubwigenge buke ku bacamanza ndetse no kubogama. Ibi bikaba byaratumye hahonyangwa uburenganzira bw’ibanze bwo guca imanza zitabera.

Ubwo urubanza rwatangiraga gusasa ku wa 29 ukuboza 2011, abacamanza b’urukiko rwa Cankuzo bari biteguye kuburanisha urubanza mu mizi yarwo, mu gihe abaregwa bo batari bafite ubunganira (avocat). Hassan Ruvakuki, wunganirwa na Maître Kabayabaya, na we akaba atari yarahawe igihe cyo gutegura ukwiregura kwe. Abunganira abaregwa banasabye ko abakiriya babo bafungirwa mu magereza azwi, aho gukomeza gufungirwa mu ma kasho ya polisi, hatujuje ibyangombwa bisabwa ku bafungwa. Abunganira abaregwa bari banasabye ko abacamanza babiri bari bumvise abaregwa muri ”Ndemeye”, bakurwa muri uru rubanza.

Ubwo urubanza rwongeraga gusasa ku wa 05 mutarama 2012, abunganira abaregwa bongeye kwanga kuburana kubera ko abo bunganiraga bari batarimurirwa mu mabohero yabigenewe, uburenganzira bw’abunganizi na bwo bukaba bwari butarubahirizwa.

Ku wa 06 mutarama, Hassan Ruvakuki n’abo bareganwa babimuriye muri gereza ya Ruyigi. Ababunganira ndetse n’imiryango yabo batewe impungenge n’umutekano w’abaregwa. Mu kwirengagiza ibisanzwe byemewe n’amategeko, mu rubanza rwakurikiyeho, urukiko rwanze kujya kuburanishiriza aho imfungwa zari zifungiwe, rutegeka ko zizanwa mu rukiko rwa Cankuzo.

Abacamanza bimuriye urubanza ku italiki itazwi, nyamara mu kwimura urwo rubanza, batumije abaregwa hadakurikijwe amategeko agenga imiburanishirize y’imanza, nko gutumira abaregwa ku buryo buzwi ndetse n’ababungamira na bo bagatumirwa ku buryo buteganywa n’amategeko.

Ku wa 11 mutarama, ababuranira abaregwa bagaragaje ikibazo cy’ibogama mu rukiko. Ku wa 16 mutarama, Hassan Ruvakuki hamwe n’indi mfungwa, bimuriwe muri gereza ya Muramvya. Umuyobozi wa gereza ya Ruyigi yavuze ko iryo yimurwa ryari ryategetswe n’umushinjacyaha wari warakurikiranye ibyo baregwa.

Amiel Nkuliza, Sweden.